OPERASIONEEL

Navorsing- en oorsigartikels wat as manuskripte aan die SATNT voorgelê word is onderhewig aan ewekniebeoordeling. Daarbenewens word alle ander inhoud wat in die SATNT gepubliseer word noukeurig nagegaan en taalkundig versorg.

Die volgende prosesse word gevolg gedurende die keuring van manuskripte en artikels:

• Die SATNT ontvang graag manuskripte wat handel oor navorsingsresultate in die Natuurwetenskappe en Tegnologie. Manuskripte kan aanlyn by die SATNT ingedien word deur die volgende web-skakel te volg: https://satntsak.co.za/indien
• Na indiening word manuskripte eers aan die Redakteur voorgelê waar daar besluit word of die inhoud van die manuskrip voldoen aan die mandaat van die SATNT. Alle manuskripte moet in ‘n styl geskryf word wat verstaanbaar is vir nie-spesialiste. Die Redakteur kan egter die manuskrip ook verwys na professionele lede van die Redaksionele Raad vir evaluasie.
• Alle manuskripte wat as geskik beskou word vir insluiting in die SATNT word eers blootgestel aan ‘n ooreenkomsopsporingsproses. Wanneer die ooreenkomsverslag dui op potensiële plagiaat, sal die verslag en manuskrip deur die Redakteur ondersoek word om te bepaal of plagiaat wel plaasgevind het. Indie plagiaat vermoed word, word die omvang van die plagiaat bepaal, en sal die plagiaatbeleid in werking tree (sien: https://satntsak.co.za/regulasies).
• Indien geen plagiaat in die ooreenkomsopsporingsproses opgespoor kan word nie, word geskikte keurders deur die Redakteur aangewys om die manuskrip te beoordeel, waarna die Tydskrifbestuurder die administrasie en tydraamwerke rondom die keuringsproses hanteer.
• Die SATNT volg ‘n dubbel-blinde keuringsproses, wat beteken dat beide die outeurs en keurders se identiteite wedersyds anoniem gehou word. Ten minste twee keurderverslae word benodig om ‘n besluit te neem oor die geskiktheid van die manuskrip om as ‘n artikel in die SATNT gepubliseer te word.
• Indien die manuskrip nie deur die keurders afgekeur word nie, word die keurders se aanbevelings met die outeurs gedeel, en word verbeteringe deur die outeurs aangebring gedurende ‘n manuskrip hersieningsproses. Hersiene manuskripte word dan weer aanlyn aan die SATNT voorgelê, soos gespesifiseer deur die Tydskrifbestuurder se aanlyn indiening stelsel.
• Die hersiende manuskrip, saam met ‘n volledige lys van die veranderinge wat in die manuskrip aangebring is, word weer aan die Redakteur voorgelê. Indien klein veranderinge aangebring is, kan die Redakteur na oorweging die manuskrip aanbeveel vir publikasie as ‘n artikel in die SATNT. Indien groot veranderinge aangebring is, besluit die Redakteur, in konsultasie met die keurders of professionele lede van die Redaksionele Raad, of die veranderinge voldoende is. Verdere verbetering kan in die laasgenoemde geval vereis word, waarna die manuskrip weer aan die outeurs teruggestuur word vir verbetering. Sodra die manuskrip voldoende verbeter is, word dit weer aan die Redakteur voorgelê vir finale goedkeuring, waarna dit deurgestuur word vir taalversorging en publikasie in die SATNT.
• Outeurs het die reg om skriftelik teen ‘n besluit van die Redakteur te appelleer, waarna die Redakteur, in konsultasie met die Redaksionele Raad (en die keurders indien nodig), ‘n finale besluit sal neem.